Música

La Muestra de Folklore «Ciudá d'Uviéu» fai un homenaxe al Orfeón de Mieres

Orfeón de Mieres.

El domingu 30 de marzu, a les 11:45 hores, nel Teatru Campoamor d’Uviéu,  el  XVI Concursu y Muestra de Folklore «Ciudá d'Uviéu» va facer un homenaxe al Orfeón de Mieres, dirixíu por Vicente Jesús Sánchez García y formáu por 48 voces mistes. L'Orfeón, creáu en 1877, ye'l más antiguu d'Asturies y ún de los más veteranos del Estáu. El so repertoriu cunta con una montonera d'obres variaes, ente les que se pue atopar la música sacra, la popular asturiana, el folclore suramericanu y el de delles autonomíes d'España.

No que ye'l Concursu, que llega a la cuarta xornada de la fase semifinal, van participar Aquilino Fernández González, de Rondera (Llangréu); el xixonés Rogelio Suárez Menéndez; Celestino Rozada Tamés, de Porrúa (Llanes), y Julio Antonio Mallada Gancedo, d'Ules (Uviéu), na modalidá de tonada.

A la gaita va cuntase cola presencia d'Hugo Noval García, de Xixón, y Daniel González Fernández, de L’Arena.  Igualmente, va competir el grupu folk Arume, de La Felguera. Tamién van poder vese les actuaciones de la pareya de baille formada polos carbayones Iñaki Sánchez Santianes y Seila Quirós Rodríguez y la integrada por Pamela Martínez Fernández y Damián Zapico Rodríguez, de Figareo.